विद्या शंकर विद्यार्थी
पोसल कुकुरा पराइल ना हो
अगोरले बा दुअरा
गइल मलिकवा त आइल ना हो,
अगोरले बा दुअरा....।
सुनले बा कुकुरा कोरोना बा आइल
गइल मलिकवा त अबहीं ना आइल
दसो नह ईश्वर से जोरले बा हो, अगोरले बा दुअरा...।
मोरा मलिकवा के ठीक केहू करीत
हमरा के बन्हकी भले केहू धरित
सरधा में अँखिया के बोरले बा हो,
अगोरले बा दुअरा....।
अइसन बलिदान त अदिमियो ना देला
दिन दुपहरिया बदला जबकि लेला
रो रो के अँखिया दूनों फोरले बा हो,
अगोरले बा दुअरा....
