अफवाह-

 

बड़ी जरूरी बात बा, बिन पढ़ले मत जाईं।
घर परिवार समाज में, सबका के समझाईं।।

सबका के समझाईं, कोरोना हs महामारी।
हs जीवन लेवे वाला, बड़का व्यापारी।।

एकरा के केहू मत कहो, "कोरोना माई"।
ई बड़का साजिश बा, समझीं रउआ भाई।।

समझीं रउआ भाई, तर्क से रउआ बोलीं।
जे पूजsता ओकर रउआ, अँखिया खोलीं।।

दुर्गा काली लक्ष्मी पूजीं, "मत पूजीं कोरोना"।
पूरा दुनिया इहे कहsता, ई हs चीन के चोना।।

ई हs चीन के चोना, सभे सावधानी करो।
करो नियम के पालन, जेसे लोग ना मsरो।।

केतने दिन से रोजे, काफी होता खर्चा।
टी. वी. पर दिनभर, एकरे पर होता चर्चा।। 

होता एपर चर्चा, फिर भी लोग बा अंधा।
अंधभक्ति में काहे होता, अइसन धंधा।।

कह अखिलेश्वर हमरा के, सुन के मत हँसीं।
बिना तर्क के बातन में, रउआ मत फँसीं।।

अखिलेश्वर मिश्र
शांति नगर
बेतिया, बिहार