भोलेशंकर की कजरी

होला  कासी  में  कजरी  बिस्वनाथ  के-
गौरी  भूतनाथ  के  ना ।।

बा मसान  पर  हिन्डोल
बान्हे भूत   आ  भकोल
लागल  बाँस  गोल गोल
जेह-प  बघवा के  खोल
साजे   भृड़्गी अ सृड़्गी सोमनाथ  के-

रज    भभूत   लागे  अंग
फुफुकारेला         भुजंग
पीके    गाँजा   तुरी  भंग
भोला     होलें    अड़भंग
सेवे   बीरभद्र   भैरव   संभुनाथ   के-

झुलुहा    झूले   अवधूत
मिलि   झुलावे भूत  दूत
संग में निसिचर  के पूत
मेला  लागलि   अजगूत
भजे   नंदी  अ   टुंडी   भोलेनाथ के-

झूले    गौरी  आ महेस
संग  मे कंतु  आ  गनेस
जटा गंग  सीस  राकेस
हँसे   रामा  आ    रमेस
पूजे  सुची  संग  सुरेस  त्रयीनाथ  के-

अमरेन्द्र
आरा