होली गीत

 

गाल पर मलिके गुलाल
देवरा सतावे दुपहरिया
गाल पर मलिके गुलाल--

पनिया भरन के गइनी पोखरवा, 
बगदल पछुआ खिंचलस अँचरवा। 
जियल भइल बा मोहाल हो
जियल भइल बा मोहाल
देवरा सतावे दुपहरिया
गाल पर मलिके गुलाल --

भँवरन के जस मेंड़ड़ाय ननदोइया, 
जल्दी  से गाड़ी  धई ल हो  सईंया। 
फगुनहटा छिलताटे छाल हो 
फगुनहटा छिलताटे छाल
देवरा सतावे दुपहरिया
गाल पर मलिके गुलाल --

पिया पैनाली दरद मोरा बुझऽ, 
टपकत मदन रस आई के लूझऽ। 
मन मोरा भइल बेहाल हो, 
आरे मन मोरा भइल बेहाल
देवरा सतावे दुपहरिया
गाल पर मलिके गुलाल -----

दिलीप पैनाली