गजल

 

डा. जहूर शैफियाबादी

 खुलेआम दिन-रात बिकाता, ई का होता ।
  महंगा-सस्ता बात बिकाता, ई का होता ।।

  प्रजातंत्र के मोल गवा के, छी-छी, थू-थू।
  धरम आ देखीं जात बिकाता, ई का होता ।।

  कहाँ सपना बापू के पुरल कवनो, बोलीं ना ।
  उनके नाम से घात बिकाता, ई का होता ।।

  कहाँ बा आपन देश खड़ा, बतलाईं ना कुछ ।
  महंगा नूनो-भात बिकाता, ई का होता ।।

  मरत बा किसानों भूख से, अब देखीं ना ई ।
  सुखारो में बरसात बिकाता, ई का होता ।।

  सत्ता के बा बाजार गरम तब, सोंची ना कुछ ।
  अबो थाती सौगात बिकाता, ई का होता ।।

डा. जहूर शैफियाबादी