भोजपुरी ग़ज़ल

 

 

बाति के मीठ माहुर पिआवल

याद बा तोर छनछन मुआवल

भेंट दिहनीं निकालल करेजा
आगि में ऊ करेजा जरावल

हम त भाई समझि के धधइनीं
तू भुलइलS ना छुरा चलावल

आगि में झोंकि दिहलS ई जिनिगी
आ भुला गइलS पानी गिरावल

साँस टूटल, सनेह सकुचाला
आस के फूल माँटी मिलावल

कौल कइलS छवावे के मड़ई
आ कि मड़ई लहास लहसावल

तीर छाती प जेतना लगल बा
सगरे तहरे त हवे चलावल

हीत हउअ रहS बनि के मीठे
छोड़ि दS अब तू लहरा लगावल

संगीत सुभाष,
गाँव+ पोस्ट- मुसहरी,
जिला- गोपालगंज, बिहार।
पिन- 841426