भगोड़ी बेटिया

 

भागि के बियाह घर से, 
करऽ जनी बेटिया।  
---------------------
माई लेखा प्रित कहाँ, 
पइबू धरतिया पर।२
नव माह धारे कोखी, 
जइसे सिप मोतिया।२
भागि के बियाह घर से, 
करऽ जनी बेटिया।।
----------------------
बाबू लेखा हित कहाँ, 
पइबू जिनिगिया में।२
अंगुरी धरा के डेगे, 
डेग चले नेहिया।२
भागि के बियाह घर से, 
करऽ  जनी बेटिया।।
---------------------
भाई जइसन मीत कहाँ, 
सउँसी उमिरिया में। २
कहाँ पइबु रखीया के,
सुन्दरऽ  सनेहिया।२
भागि के बियाह घर से, 
करऽ  जनी बेटिया।।
---------------------
दीदी जइसन चित कहाँ, 
पढ़िहें संघतिया जे।
हियरा के बात जानी, 
हरीहें दरदीया।
भागि के बियाह घर से, 
करऽ जनी बेटिया।।
---------------------
टोला टापी हँसि खुबे, 
गउंआ जवरवा से,
आभी-गाभी मारी सभे,
हँसी गांव गोतिया।
भागि के बियाह घर से, 
करऽ जनी बेटिया।।
---------------------
अँखीया से 'नीर' बही,
जीयरा क्लेश जरी।
फसरी लगाई मुई 
जीयते इजतीया।
भागि के बियाह घर से, 
करऽ जनी बेटिया।।
**************
निर्भय नीर